پۆلیس هەڵیکوتایە سەر شوێنی نیشتەجێبوونی ڕۆژنامەنووسان لە ئەستەنبوڵ و دیاربەکر و وان
لەسەر فەرمانی داواکاری گشتی ئەستەنبوڵ، پۆلیس هەڵیکوتایە سەر کۆمپانیاکانی بەرهەمهێنانی میدیا لە دیاربەکر و وان و ئەستەنبوڵ؛ وە پێنج ڕۆژنامەنووسی دەستگیر کرد. ئەم چالاکییە بەرامبەر بە ڕۆژنامەنووسانی کورد لە تورکیە لە کاتێکدا بوو کە دانوستانە بەردەوامەکان بۆ دەستپێکردنەوەی پرۆسەی ئاشتەوایی.
بەگوێرەی ئاژانسی هەواڵی میزۆپۆتامیا، بەرەبەیانی ئەمڕۆ هەینی، بە فەرمانی داواکاری گشتیی ئەستەنبوڵ، پۆلیسی تورکیا بە زۆر چووەتە ناو نووسینگەکانی دوو کۆمپانیای بەرهەمهێنانی میدیایی بە ناوەکانی مارتی و گونسێل لە ناحیەی بیئۆغلوی ئەو شارە. ئەفسەرەکان بەبێ ئاگاداری خاوەن ماڵەکان دەستیان بەسەر هەموو ئامێرەکاندا گرتووە، بە کۆمپیوتەر و میمۆری دەرەکیشەوە.
لە هەمان کاتدا پۆلیس هەڵیکوتایە سەر شوێنی نیشتەجێبوونی ڕۆژنامەنووسانی ئەستەنبوڵ و دیاربەکر و وان. ئەم ئۆپەراسیۆنانە بووە هۆی دەستگیرکردنی ڕەیحان هاچیۆئۆغڵو لە شاری وان و چوار ڕۆژنامەنووسی دیکە – ئەحمەد گونەش، نەجلا دەمیر، وڵات ئاکین و ڕەحیما کار – لە ئەستەنبوڵ.
دوایین ڕاپۆرتەکان ئاماژە بەوە دەکەن کە فەرمانی دەستگیرکردن بۆ ڕۆژنامەنووسان دەرچووە و بۆ ماوەی ٢٤ کاتژمێر سەردان لە نێوان دەستگیرکراوەکان و پارێزەرەکانیان قەدەغە کراوە.
ڕاپۆرتەکە دەشڵێت، دەستگیرکردنی ڕێیهان هاچیۆئۆغڵو توندوتیژی و هەڕەشەی لەگەڵدا بووە، هەروەها دەست بەسەر کەرەستە تایبەتمەندەکانیدا گیراوە. هاچیۆئۆغڵو کە لە شاری وان دەستبەسەر کرابوو؛ گواستراوەتەوە بۆ بەشی پۆلیسی شار؛ وە پارێزەرەکەی ئاگادارکرایەوە کە فەرمانی نهێنی بۆ ئەم دۆسیەیە دەرچووە؛ وە هەر کۆبوونەوەیەک بۆ ماوەی شەو و ڕۆژێک قەدەغە کراوە.
لە ڕووداوێکی پەیوەندیداردا، گۆلستان دورسون کە لە ٢١ی کانوونی دووەمی ٢٠٢٤ لەگەڵ حەوت ڕۆژنامەنووسی دیکە لە شاری شیشەنێی ئەستەنبوڵ دەستبەسەر کرابوون؛ بۆ ناڕەزایەتی دەربڕین بەرامبەر بە کوشتنی ڕۆژنامەنووسانی کورد نازم دەشتان و جەهان بەگین کە لە هێرشی فڕۆکەی بێفڕۆکەوانی تورکیا لە ١٩ی کانوونی دووەمدا کوژران؛ تا ئێستاش لە زیندانی مەڕمەڕەدایە. لە میانی پەیوەندییەکدا لەگەڵ پارێزەرەکەی ئاشکرایکردووە، بەهۆی ڕەتکردنەوەی قبوڵکردنی تۆمەتی بەرپرسانی زیندان بە “پڕوپاگەندە بۆ ڕێکخراوێک” ڕووبەڕووی ڕێوشوێنی سزا بووەتەوە.
جگە لە دەستگیرکردنی دوانزە ڕۆژنامەنووسی کورد لە تورکیا لە مانگی ڕابردوودا، پێنج ڕۆژنامەنووسی دیکەی کورد لە ساڵی ٢٠٢٤ لە هەرێمی کوردستانی عێراق و باکووری ڕۆژهەڵاتی سووریا بە هۆی فڕۆکە بێفڕۆکەوانەکانی تورکیا کوژران.
